Song of Solomon 4

Song of Solomon 4:1

quam pulchra es amica mea quam pulchra es oculi tui columbarum absque eo quod intrinsecus latet capilli tui sicut greges caprarum quae ascenderunt de monte Galaad

Song of Solomon 4:2

dentes tui sicut greges tonsarum quae ascenderunt de lavacro omnes gemellis fetibus et sterilis non est inter eas

Song of Solomon 4:3

sicut vitta coccinea labia tua et eloquium tuum dulce sicut fragmen mali punici ita genae tuae absque eo quod intrinsecus latet

Song of Solomon 4:4

sicut turris David collum tuum quae aedificata est cum propugnaculis mille clypei pendent ex ea omnis armatura fortium

Song of Solomon 4:5

duo ubera tua sicut duo hinuli capreae gemelli qui pascuntur in liliis

Song of Solomon 4:6

donec adspiret dies et inclinentur umbrae vadam ad montem murrae et ad collem turis

Song of Solomon 4:7

tota pulchra es amica mea et macula non est in te

Song of Solomon 4:8

veni de Libano sponsa veni de Libano veni coronaberis de capite Amana de vertice Sanir et Hermon de cubilibus leonum de montibus pardorum

Song of Solomon 4:9

vulnerasti cor meum soror mea sponsa vulnerasti cor meum in uno oculorum tuorum et in uno crine colli tui

Song of Solomon 4:10

quam pulchrae sunt mammae tuae soror mea sponsa pulchriora ubera tua vino et odor unguentorum tuorum super omnia aromata

Song of Solomon 4:11

favus distillans labia tua sponsa mel et lac sub lingua tua et odor vestimentorum tuorum sicut odor turis

Song of Solomon 4:12

hortus conclusus soror mea sponsa hortus conclusus fons signatus

Song of Solomon 4:13

emissiones tuae paradisus malorum punicorum cum pomorum fructibus cypri cum nardo

Song of Solomon 4:14

nardus et crocus fistula et cinnamomum cum universis lignis Libani murra et aloe cum omnibus primis unguentis

Song of Solomon 4:15

fons hortorum puteus aquarum viventium quae fluunt impetu de Libano

Song of Solomon 4:16

surge aquilo et veni auster perfla hortum meum et fluant aromata illius