2 Timothy 4

2 Timothy 4:1

testificor coram Deo et Christo Iesu qui iudicaturus est vivos ac mortuos et adventum ipsius et regnum eius

2 Timothy 4:2

praedica verbum insta oportune inportune argue obsecra increpa in omni patientia et doctrina

2 Timothy 4:3

erit enim tempus cum sanam doctrinam non sustinebunt sed ad sua desideria coacervabunt sibi magistros prurientes auribus

2 Timothy 4:4

et a veritate quidem auditum avertent ad fabulas autem convertentur

2 Timothy 4:5

tu vero vigila in omnibus labora opus fac evangelistae ministerium tuum imple

2 Timothy 4:6

ego enim iam delibor et tempus meae resolutionis instat

2 Timothy 4:7

bonum certamen certavi cursum consummavi fidem servavi

2 Timothy 4:8

in reliquo reposita est mihi iustitiae corona quam reddet mihi Dominus in illa die iustus iudex non solum autem mihi sed et his qui diligunt adventum eius

2 Timothy 4:9

festina venire ad me cito

2 Timothy 4:10

Demas enim me dereliquit diligens hoc saeculum et abiit Thessalonicam Crescens in Galliam Titus in Dalmatiam

2 Timothy 4:11

Lucas est mecum solus Marcum adsume et adduc tecum est enim mihi utilis in ministerium

2 Timothy 4:12

Tychicum autem misi Ephesum

2 Timothy 4:13

paenulam quam reliqui Troade apud Carpum veniens adfers et libros maxime autem membranas

2 Timothy 4:14

Alexander aerarius multa mala mihi ostendit reddat ei Dominus secundum opera eius

2 Timothy 4:15

quem et tu devita valde enim restitit verbis nostris

2 Timothy 4:16

in prima mea defensione nemo mihi adfuit sed omnes me dereliquerunt non illis reputetur

2 Timothy 4:17

Dominus autem mihi adstitit et confortavit me ut per me praedicatio impleatur et audiant omnes gentes et liberatus sum de ore leonis

2 Timothy 4:18

liberabit me Dominus ab omni opere malo et salvum faciet in regnum suum caeleste cui gloria in saecula saeculorum amen

2 Timothy 4:19

saluta Priscam et Aquilam et Onesifori domum

2 Timothy 4:20

Erastus remansit Corinthi Trophimum autem reliqui infirmum Mileti

2 Timothy 4:21

festina ante hiemem venire salutat te Eubulus et Pudens et Linus et Claudia et fratres omnes

2 Timothy 4:22

Dominus Iesus cum spiritu tuo gratia nobiscum amen