2 Peter 2

2 Peter 2:1

fuerunt vero et pseudoprophetae in populo sicut et in vobis erunt magistri mendaces qui introducent sectas perditionis et eum qui emit eos Dominum negant superducentes sibi celerem perditionem

2 Peter 2:2

et multi sequentur eorum luxurias per quos via veritatis blasphemabitur

2 Peter 2:3

et in avaritia fictis verbis de vobis negotiabuntur quibus iudicium iam olim non cessat et perditio eorum non dormitat

2 Peter 2:4

si enim Deus angelis peccantibus non pepercit sed rudentibus inferni detractos in tartarum tradidit in iudicium cruciatos reservari

2 Peter 2:5

et originali mundo non pepercit sed octavum Noe iustitiae praeconem custodivit diluvium mundo impiorum inducens

2 Peter 2:6

et civitates Sodomorum et Gomorraeorum in cinerem redigens eversione damnavit exemplum eorum qui impie acturi sunt ponens

2 Peter 2:7

et iustum Loth oppressum a nefandorum iniuria conversatione eruit

2 Peter 2:8

aspectu enim et auditu iustus erat habitans apud eos qui diem de die animam iustam iniquis operibus cruciabant

2 Peter 2:9

novit Dominus pios de temptatione eripere iniquos vero in diem iudicii cruciandos reservare

2 Peter 2:10

magis autem eos qui post carnem in concupiscentia inmunditiae ambulant dominationemque contemnunt audaces sibi placentes sectas non metuunt blasphemantes

2 Peter 2:11

ubi angeli fortitudine et virtute cum sint maiores non portant adversum se execrabile iudicium

2 Peter 2:12

hii vero velut inrationabilia pecora naturaliter in captionem et in perniciem in his quae ignorant blasphemantes in corruptione sua et peribunt

2 Peter 2:13

percipientes mercedem iniustitiae voluptatem existimantes diei delicias coinquinationes et maculae deliciis affluentes in conviviis suis luxuriantes vobiscum

2 Peter 2:14

oculos habentes plenos adulterio et incessabiles delicti pellicentes animas instabiles cor exercitatum avaritiae habentes maledictionis filii

2 Peter 2:15

derelinquentes rectam viam erraverunt secuti viam Balaam ex Bosor qui mercedem iniquitatis amavit

2 Peter 2:16

correptionem vero habuit suae vesaniae subiugale mutum in hominis voce loquens prohibuit prophetae insipientiam

2 Peter 2:17

hii sunt fontes sine aqua et nebulae turbinibus exagitatae quibus caligo tenebrarum reservatur

2 Peter 2:18

superba enim vanitatis loquentes pellicent in desideriis carnis luxuriae eos qui paululum effugiunt qui in errore conversantur

2 Peter 2:19

libertatem illis promittentes cum ipsi servi sint corruptionis a quo enim quis superatus est huius et servus est

2 Peter 2:20

si enim refugientes coinquinationes mundi in cognitione Domini nostri et salvatoris Iesu Christi his rursus inpliciti superantur facta sunt eis posteriora deteriora prioribus

2 Peter 2:21

melius enim erat illis non cognoscere viam iustitiae quam post agnitionem retrorsum converti ab eo quod illis traditum est sancto mandato

2 Peter 2:22

contigit enim eis illud veri proverbii canis reversus ad suum vomitum et sus lota in volutabro luti