2 Corinthians 5

2 Corinthians 5:1

scimus enim quoniam si terrestris domus nostra huius habitationis dissolvatur quod aedificationem ex Deo habeamus domum non manufactam aeternam in caelis

2 Corinthians 5:2

nam et in hoc ingemescimus habitationem nostram quae de caelo est superindui cupientes

2 Corinthians 5:3

si tamen vestiti non nudi inveniamur

2 Corinthians 5:4

nam et qui sumus in tabernaculo ingemescimus gravati eo quod nolumus expoliari sed supervestiri ut absorbeatur quod mortale est a vita

2 Corinthians 5:5

qui autem efficit nos in hoc ipsum Deus qui dedit nobis pignus Spiritus

2 Corinthians 5:6

audentes igitur semper et scientes quoniam dum sumus in corpore peregrinamur a Domino

2 Corinthians 5:7

per fidem enim ambulamus et non per speciem

2 Corinthians 5:8

audemus autem et bonam voluntatem habemus magis peregrinari a corpore et praesentes esse ad Deum

2 Corinthians 5:9

et ideo contendimus sive absentes sive praesentes placere illi

2 Corinthians 5:10

omnes enim nos manifestari oportet ante tribunal Christi ut referat unusquisque propria corporis prout gessit sive bonum sive malum

2 Corinthians 5:11

scientes ergo timorem Domini hominibus suademus Deo autem manifesti sumus spero autem et in conscientiis vestris manifestos nos esse

2 Corinthians 5:12

non iterum nos commendamus vobis sed occasionem damus vobis gloriandi pro nobis ut habeatis ad eos qui in facie gloriantur et non in corde

2 Corinthians 5:13

sive enim mente excedimus Deo sive sobrii sumus vobis

2 Corinthians 5:14

caritas enim Christi urget nos aestimantes hoc quoniam si unus pro omnibus mortuus est ergo omnes mortui sunt

2 Corinthians 5:15

et pro omnibus mortuus est ut et qui vivunt iam non sibi vivant sed ei qui pro ipsis mortuus est et resurrexit

2 Corinthians 5:16

itaque nos ex hoc neminem novimus secundum carnem et si cognovimus secundum carnem Christum sed nunc iam non novimus

2 Corinthians 5:17

si qua ergo in Christo nova creatura vetera transierunt ecce facta sunt nova

2 Corinthians 5:18

omnia autem ex Deo qui reconciliavit nos sibi per Christum et dedit nobis ministerium reconciliationis

2 Corinthians 5:19

quoniam quidem Deus erat in Christo mundum reconcilians sibi non reputans illis delicta ipsorum et posuit in nobis verbum reconciliationis

2 Corinthians 5:20

pro Christo ergo legationem fungimur tamquam Deo exhortante per nos obsecramus pro Christo reconciliamini Deo

2 Corinthians 5:21

eum qui non noverat peccatum pro nobis peccatum fecit ut nos efficeremur iustitia Dei in ipso