Psalms 142

Psalms 142:1

psalmus David quando filius eum persequebatur Domine exaudi orationem meam auribus percipe obsecrationem meam in veritate tua exaudi me in tua iustitia

Psalms 142:2

et non intres in iudicio cum servo tuo quia non iustificabitur in conspectu tuo omnis vivens

Psalms 142:3

quia persecutus est inimicus animam meam humiliavit in terra vitam meam conlocavit me in obscuris sicut mortuos saeculi

Psalms 142:4

et anxiatus est super me spiritus meus in me turbatum est cor meum

Psalms 142:5

memor fui dierum antiquorum meditatus sum in omnibus operibus tuis in factis manuum tuarum meditabar

Psalms 142:6

expandi manus meas ad te anima mea sicut terra sine aqua tibi diapsalma

Psalms 142:7

velociter exaudi me Domine defecit spiritus meus non avertas faciem tuam a me et similis ero descendentibus in lacum

Psalms 142:8

auditam mihi fac mane misericordiam tuam quia in te speravi notam fac mihi viam in qua ambulem quia ad te levavi animam meam

Psalms 142:9

eripe me de inimicis meis Domine ad te confugi

Psalms 142:10

doce me facere voluntatem tuam quia Deus meus es tu spiritus tuus bonus deducet me in terra recta

Psalms 142:11

propter nomen tuum Domine vivificabis me in aequitate tua educes de tribulatione animam meam

Psalms 142:12

et in misericordia tua disperdes inimicos meos et perdes omnes qui tribulant animam meam quoniam ego servus tuus sum