Matthew 9

Matthew 9:1

et ascendens in naviculam transfretavit et venit in civitatem suam

Matthew 9:2

et ecce offerebant ei paralyticum iacentem in lecto et videns Iesus fidem illorum dixit paralytico confide fili remittuntur tibi peccata tua

Matthew 9:3

et ecce quidam de scribis dixerunt intra se hic blasphemat

Matthew 9:4

et cum vidisset Iesus cogitationes eorum dixit ut quid cogitatis mala in cordibus vestris

Matthew 9:5

quid est facilius dicere dimittuntur tibi peccata aut dicere surge et ambula

Matthew 9:6

ut sciatis autem quoniam Filius hominis habet potestatem in terra dimittendi peccata tunc ait paralytico surge tolle lectum tuum et vade in domum tuam

Matthew 9:7

et surrexit et abiit in domum suam

Matthew 9:8

videntes autem turbae timuerunt et glorificaverunt Deum qui dedit potestatem talem hominibus

Matthew 9:9

et cum transiret inde Iesus vidit hominem sedentem in teloneo Mattheum nomine et ait illi sequere me et surgens secutus est eum

Matthew 9:10

et factum est discumbente eo in domo ecce multi publicani et peccatores venientes discumbebant cum Iesu et discipulis eius

Matthew 9:11

et videntes Pharisaei dicebant discipulis eius quare cum publicanis et peccatoribus manducat magister vester

Matthew 9:12

at Iesus audiens ait non est opus valentibus medico sed male habentibus

Matthew 9:13

euntes autem discite quid est misericordiam volo et non sacrificium non enim veni vocare iustos sed peccatores

Matthew 9:14

tunc accesserunt ad eum discipuli Iohannis dicentes quare nos et Pharisaei ieiunamus frequenter discipuli autem tui non ieiunant

Matthew 9:15

et ait illis Iesus numquid possunt filii sponsi lugere quamdiu cum illis est sponsus venient autem dies cum auferetur ab eis sponsus et tunc ieiunabunt

Matthew 9:16

nemo autem inmittit commissuram panni rudis in vestimentum vetus tollit enim plenitudinem eius a vestimento et peior scissura fit

Matthew 9:17

neque mittunt vinum novum in utres veteres alioquin rumpuntur utres et vinum effunditur et utres pereunt sed vinum novum in utres novos mittunt et ambo conservantur

Matthew 9:18

haec illo loquente ad eos ecce princeps unus accessit et adorabat eum dicens filia mea modo defuncta est sed veni inpone manum super eam et vivet

Matthew 9:19

et surgens Iesus sequebatur eum et discipuli eius

Matthew 9:20

et ecce mulier quae sanguinis fluxum patiebatur duodecim annis accessit retro et tetigit fimbriam vestimenti eius

Matthew 9:21

dicebat enim intra se si tetigero tantum vestimentum eius salva ero

Matthew 9:22

at Iesus conversus et videns eam dixit confide filia fides tua te salvam fecit et salva facta est mulier ex illa hora

Matthew 9:23

et cum venisset Iesus in domum principis et vidisset tibicines et turbam tumultuantem

Matthew 9:24

dicebat recedite non est enim mortua puella sed dormit et deridebant eum

Matthew 9:25

et cum eiecta esset turba intravit et tenuit manum eius et surrexit puella

Matthew 9:26

et exiit fama haec in universam terram illam

Matthew 9:27

et transeunte inde Iesu secuti sunt eum duo caeci clamantes et dicentes miserere nostri Fili David

Matthew 9:28

cum autem venisset domum accesserunt ad eum caeci et dicit eis Iesus creditis quia possum hoc facere vobis dicunt ei utique Domine

Matthew 9:29

tunc tetigit oculos eorum dicens secundum fidem vestram fiat vobis

Matthew 9:30

et aperti sunt oculi illorum et comminatus est illis Iesus dicens videte ne quis sciat

Matthew 9:31

illi autem exeuntes diffamaverunt eum in tota terra illa

Matthew 9:32

egressis autem illis ecce obtulerunt ei hominem mutum daemonium habentem

Matthew 9:33

et eiecto daemone locutus est mutus et miratae sunt turbae dicentes numquam paruit sic in Israhel

Matthew 9:34

Pharisaei autem dicebant in principe daemoniorum eicit daemones

Matthew 9:35

et circumibat Iesus civitates omnes et castella docens in synagogis eorum et praedicans evangelium regni et curans omnem languorem et omnem infirmitatem

Matthew 9:36

videns autem turbas misertus est eis quia erant vexati et iacentes sicut oves non habentes pastorem

Matthew 9:37

tunc dicit discipulis suis messis quidem multa operarii autem pauci

Matthew 9:38

rogate ergo dominum messis ut eiciat operarios in messem suam