1 Timothy 5

1 Timothy 5:1

seniorem ne increpaveris sed obsecra ut patrem iuvenes ut fratres

1 Timothy 5:2

anus ut matres iuvenculas ut sorores in omni castitate

1 Timothy 5:3

viduas honora quae vere viduae sunt

1 Timothy 5:4

si qua autem vidua filios aut nepotes habet discant primum domum suam regere et mutuam vicem reddere parentibus hoc enim acceptum est coram Deo

1 Timothy 5:5

quae autem vere vidua est et desolata speravit in Deum et instat obsecrationibus et orationibus nocte ac die

1 Timothy 5:6

nam quae in deliciis est vivens mortua est

1 Timothy 5:7

et hoc praecipe ut inreprehensibiles sint

1 Timothy 5:8

si quis autem suorum et maxime domesticorum curam non habet fidem negavit et est infideli deterior

1 Timothy 5:9

vidua eligatur non minus sexaginta annorum quae fuerit unius viri uxor

1 Timothy 5:10

in operibus bonis testimonium habens si filios educavit si hospitio recepit si sanctorum pedes lavit si tribulationem patientibus subministravit si omne opus bonum subsecuta est

1 Timothy 5:11

adulescentiores autem viduas devita cum enim luxuriatae fuerint in Christo nubere volunt

1 Timothy 5:12

habentes damnationem quia primam fidem irritam fecerunt

1 Timothy 5:13

simul autem et otiosae discunt circumire domos non solum otiosae sed et verbosae et curiosae loquentes quae non oportet

1 Timothy 5:14

volo ergo iuveniores nubere filios procreare matres familias esse nullam occasionem dare adversario maledicti gratia

1 Timothy 5:15

iam enim quaedam conversae sunt retro Satanan

1 Timothy 5:16

si qua fidelis habet viduas subministret illis et non gravetur ecclesia ut his quae vere viduae sunt sufficiat

1 Timothy 5:17

qui bene praesunt presbyteri duplici honore digni habeantur maxime qui laborant in verbo et doctrina

1 Timothy 5:18

dicit enim scriptura non infrenabis os bovi trituranti et dignus operarius mercede sua

1 Timothy 5:19

adversus presbyterum accusationem noli recipere nisi sub duobus et tribus testibus

1 Timothy 5:20

peccantes coram omnibus argue ut et ceteri timorem habeant

1 Timothy 5:21

testor coram Deo et Christo Iesu et electis angelis ut haec custodias sine praeiudicio nihil faciens in aliam partem declinando

1 Timothy 5:22

manus cito nemini inposueris neque communicaveris peccatis alienis te ipsum castum custodi

1 Timothy 5:23

noli adhuc aquam bibere sed vino modico utere propter stomachum tuum et frequentes tuas infirmitates

1 Timothy 5:24

quorundam hominum peccata manifesta sunt praecedentia ad iudicium quosdam autem et subsequuntur

1 Timothy 5:25

similiter et facta bona manifesta sunt et quae aliter se habent abscondi non possunt