1 Samuel 8

1 Samuel 8:1

factum est autem cum senuisset Samuhel posuit filios suos iudices Israhel

1 Samuel 8:2

fuitque nomen filii eius primogeniti Iohel et nomen secundi Abia iudicum in Bersabee

1 Samuel 8:3

et non ambulaverunt filii illius in viis eius sed declinaverunt post avaritiam acceperuntque munera et perverterunt iudicium

1 Samuel 8:4

congregati ergo universi maiores natu Israhel venerunt ad Samuhel in Ramatha

1 Samuel 8:5

dixeruntque ei ecce tu senuisti et filii tui non ambulant in viis tuis constitue nobis regem ut iudicet nos sicut universae habent nationes

1 Samuel 8:6

displicuitque sermo in oculis Samuhelis eo quod dixissent da nobis regem ut iudicet nos et oravit Samuhel Dominum

1 Samuel 8:7

dixit autem Dominus ad Samuhel audi vocem populi in omnibus quae loquuntur tibi non enim te abiecerunt sed me ne regnem super eos

1 Samuel 8:8

iuxta omnia opera sua quae fecerunt a die qua eduxi eos de Aegypto usque ad diem hanc sicut dereliquerunt me et servierunt diis alienis sic faciunt etiam tibi

1 Samuel 8:9

nunc ergo audi vocem eorum verumtamen contestare eos et praedic eis ius regis qui regnaturus est super eos

1 Samuel 8:10

dixit itaque Samuhel omnia verba Domini ad populum qui petierat a se regem

1 Samuel 8:11

et ait hoc erit ius regis qui imperaturus est vobis filios vestros tollet et ponet in curribus suis facietque sibi equites et praecursores quadrigarum suarum

1 Samuel 8:12

et constituet sibi tribunos et centuriones et aratores agrorum suorum et messores segetum et fabros armorum et curruum suorum

1 Samuel 8:13

filias quoque vestras faciet sibi unguentarias et focarias et panificas

1 Samuel 8:14

agros quoque vestros et vineas et oliveta optima tollet et dabit servis suis

1 Samuel 8:15

sed et segetes vestras et vinearum reditus addecimabit ut det eunuchis et famulis suis

1 Samuel 8:16

servos etiam vestros et ancillas et iuvenes optimos et asinos auferet et ponet in opere suo

1 Samuel 8:17

greges vestros addecimabit vosque eritis ei servi

1 Samuel 8:18

et clamabitis in die illa a facie regis vestri quem elegistis vobis et non exaudiet vos Dominus in die illa

1 Samuel 8:19

noluit autem populus audire vocem Samuhel sed dixerunt nequaquam rex enim erit super nos

1 Samuel 8:20

et erimus nos quoque sicut omnes gentes et iudicabit nos rex noster et egredietur ante nos et pugnabit bella nostra pro nobis

1 Samuel 8:21

et audivit Samuhel omnia verba populi et locutus est ea in auribus Domini

1 Samuel 8:22

dixit autem Dominus ad Samuhel audi vocem eorum et constitue super eos regem et ait Samuhel ad viros Israhel vadat unusquisque in civitatem suam