Psalms 5

¹ in finem pro ea quae hereditatem consequitur psalmus David (5:2) verba mea auribus percipe Domine intellege clamorem meum

² (5:3) intende voci orationis meae rex meus et Deus meus

³ (5:4) quoniam ad te orabo Domine mane exaudies vocem meam

⁴ (5:5) mane adstabo tibi et videbo quoniam non deus volens iniquitatem tu es

⁵ (5:6) neque habitabit iuxta te malignus neque permanebunt iniusti ante oculos tuos

⁶ (5:7) odisti omnes qui operantur iniquitatem perdes %omnes; qui loquuntur mendacium virum sanguinum et dolosum abominabitur Dominus

⁷ (5:8) ego autem in multitudine misericordiae tuae introibo in domum tuam adorabo ad templum sanctum tuum in timore tuo

⁸ (5:9) Domine deduc me in iustitia tua propter inimicos meos dirige in conspectu meo viam tuam

⁹ (5:10) quoniam non est in ore eorum veritas cor eorum vanum est

¹⁰ (5:11) sepulchrum patens est guttur eorum linguis suis dolose agebant iudica illos Deus decidant a cogitationibus suis secundum multitudinem impietatum eorum expelle eos quoniam inritaverunt te Domine

¹¹ (5:12) et laetentur omnes qui sperant in te in aeternum exultabunt et habitabis in eis et gloriabuntur in te omnes qui diligunt nomen tuum

¹² (5:13) quoniam tu benedices iusto Domine ut scuto bonae voluntatis coronasti nos