Matthew 24

Matthew 24:1

et egressus Iesus de templo ibat et accesserunt discipuli eius ut ostenderent ei aedificationes templi

Matthew 24:2

ipse autem respondens dixit eis videtis haec omnia amen dico vobis non relinquetur hic lapis super lapidem qui non destruatur

Matthew 24:3

sedente autem eo super montem Oliveti accesserunt ad eum discipuli secreto dicentes dic nobis quando haec erunt et quod signum adventus tui et consummationis saeculi

Matthew 24:4

et respondens Iesus dixit eis videte ne quis vos seducat

Matthew 24:5

multi enim venient in nomine meo dicentes ego sum Christus et multos seducent

Matthew 24:6

audituri autem estis proelia et opiniones proeliorum videte ne turbemini oportet enim haec fieri sed nondum est finis

Matthew 24:7

consurget enim gens in gentem et regnum in regnum et erunt pestilentiae et fames et terraemotus per loca

Matthew 24:8

haec autem omnia initia sunt dolorum

Matthew 24:9

tunc tradent vos in tribulationem et occident vos et eritis odio omnibus gentibus propter nomen meum

Matthew 24:10

et tunc scandalizabuntur multi et invicem tradent et odio habebunt invicem

Matthew 24:11

et multi pseudoprophetae surgent et seducent multos

Matthew 24:12

et quoniam abundabit iniquitas refrigescet caritas multorum

Matthew 24:13

qui autem permanserit usque in finem hic salvus erit

Matthew 24:14

et praedicabitur hoc evangelium regni in universo orbe in testimonium omnibus gentibus et tunc veniet consummatio

Matthew 24:15

cum ergo videritis abominationem desolationis quae dicta est a Danihelo propheta stantem in loco sancto qui legit intellegat

Matthew 24:16

tunc qui in Iudaea sunt fugiant ad montes

Matthew 24:17

et qui in tecto non descendat tollere aliquid de domo sua

Matthew 24:18

et qui in agro non revertatur tollere tunicam suam

Matthew 24:19

vae autem praegnatibus et nutrientibus in illis diebus

Matthew 24:20

orate autem ut non fiat fuga vestra hieme vel sabbato

Matthew 24:21

erit enim tunc tribulatio magna qualis non fuit ab initio mundi usque modo neque fiet

Matthew 24:22

et nisi breviati fuissent dies illi non fieret salva omnis caro sed propter electos breviabuntur dies illi

Matthew 24:23

tunc si quis vobis dixerit ecce hic Christus aut illic nolite credere

Matthew 24:24

surgent enim pseudochristi et pseudoprophetae et dabunt signa magna et prodigia ita ut in errorem inducantur si fieri potest etiam electi

Matthew 24:25

ecce praedixi vobis

Matthew 24:26

si ergo dixerint vobis ecce in deserto est nolite exire ecce in penetrabilibus nolite credere

Matthew 24:27

sicut enim fulgur exit ab oriente et paret usque in occidente ita erit et adventus Filii hominis

Matthew 24:28

ubicumque fuerit corpus illuc congregabuntur aquilae

Matthew 24:29

statim autem post tribulationem dierum illorum sol obscurabitur et luna non dabit lumen suum et stellae cadent de caelo et virtutes caelorum commovebuntur

Matthew 24:30

et tunc parebit signum Filii hominis in caelo et tunc plangent omnes tribus terrae et videbunt Filium hominis venientem in nubibus caeli cum virtute multa et maiestate

Matthew 24:31

et mittet angelos suos cum tuba et voce magna et congregabunt electos eius a quattuor ventis a summis caelorum usque ad terminos eorum

Matthew 24:32

ab arbore autem fici discite parabolam cum iam ramus eius tener fuerit et folia nata scitis quia prope est aestas

Matthew 24:33

ita et vos cum videritis haec omnia scitote quia prope est in ianuis

Matthew 24:34

amen dico vobis quia non praeteribit haec generatio donec omnia haec fiant

Matthew 24:35

caelum et terra transibunt verba vero mea non praeteribunt

Matthew 24:36

de die autem illa et hora nemo scit neque angeli caelorum nisi Pater solus

Matthew 24:37

sicut autem in diebus Noe ita erit et adventus Filii hominis

Matthew 24:38

sicut enim erant in diebus ante diluvium comedentes et bibentes nubentes et nuptum tradentes usque ad eum diem quo introivit in arcam Noe

Matthew 24:39

et non cognoverunt donec venit diluvium et tulit omnes ita erit et adventus Filii hominis

Matthew 24:40

tunc duo erunt in agro unus adsumetur et unus relinquetur

Matthew 24:41

duae molentes in mola una adsumetur et una relinquetur

Matthew 24:42

vigilate ergo quia nescitis qua hora Dominus vester venturus sit

Matthew 24:43

illud autem scitote quoniam si sciret pater familias qua hora fur venturus esset vigilaret utique et non sineret perfodiri domum suam

Matthew 24:44

ideoque et vos estote parati quia qua nescitis hora Filius hominis venturus est

Matthew 24:45

quis putas est fidelis servus et prudens quem constituit dominus suus supra familiam suam ut det illis cibum in tempore

Matthew 24:46

beatus ille servus quem cum venerit dominus eius invenerit sic facientem

Matthew 24:47

amen dico vobis quoniam super omnia bona sua constituet eum

Matthew 24:48

si autem dixerit malus servus ille in corde suo moram facit dominus meus venire

Matthew 24:49

et coeperit percutere conservos suos manducet autem et bibat cum ebriis

Matthew 24:50

veniet dominus servi illius in die qua non sperat et hora qua ignorat

Matthew 24:51

et dividet eum partemque eius ponet cum hypocritis illic erit fletus et stridor dentium