2 Chronicles 29

2 Chronicles 29:1

igitur Ezechias regnare coepit cum viginti quinque esset annorum et viginti novem annis regnavit in Hierusalem nomen matris eius Abia filia Zacchariae

2 Chronicles 29:2

fecitque quod erat placitum in conspectu Domini iuxta omnia quae fecerat David pater eius

2 Chronicles 29:3

ipse anno et mense primo regni sui aperuit valvas domus Domini et instauravit eas

2 Chronicles 29:4

adduxitque sacerdotes atque Levitas et congregavit eos in plateam orientalem

2 Chronicles 29:5

dixitque ad eos audite me Levitae et sanctificamini mundate domum Domini Dei patrum vestrorum auferte omnem inmunditiam de sanctuario

2 Chronicles 29:6

peccaverunt patres nostri et fecerunt malum in conspectu Domini Dei nostri derelinquentes eum averterunt facies suas a tabernaculo Domini et praebuerunt dorsum

2 Chronicles 29:7

cluserunt ostia quae erant in porticu et extinxerunt lucernas incensumque non adoleverunt et holocausta non obtulerunt in sanctuario Deo Israhel

2 Chronicles 29:8

concitatus est itaque furor Domini super Iudam et Hierusalem tradiditque eos in commotionem et in interitum et in sibilum sicut ipsi cernitis oculis vestris

2 Chronicles 29:9

en corruerunt patres nostri gladiis filii nostri et filiae nostrae et coniuges captivae ductae sunt propter hoc scelus

2 Chronicles 29:10

nunc igitur placet mihi ut ineamus foedus cum Domino Deo Israhel et avertat a nobis furorem irae suae

2 Chronicles 29:11

filii mi nolite neglegere vos elegit Dominus ut stetis coram eo et ministretis illi colatis eum et cremetis incensum

2 Chronicles 29:12

surrexerunt ergo Levitae Maath filius Amasiae et Iohel filius Azariae de filiis Caath porro de filiis Merari Cis filius Abdai et Azarias filius Iallelel de filiis autem Gersom Ioha filius Zemma et Eden filius Ioaha

2 Chronicles 29:13

at vero de filiis Elisaphan Samri et Iahihel de filiis quoque Asaph Zaccharias et Mathanias

2 Chronicles 29:14

necnon de filiis Heman Iahihel et Semei sed et de filiis Idithun Semeias et Ozihel

2 Chronicles 29:15

congregaveruntque fratres suos et sanctificati sunt et ingressi iuxta mandatum regis et imperium Domini ut expiarent domum Dei

2 Chronicles 29:16

sacerdotes quoque ingressi templum Domini ut sanctificarent illud extulerunt omnem inmunditiam quam intro reppererant in vestibulum domus Domini quam tulerunt Levitae et asportaverunt ad torrentem Cedron foras

2 Chronicles 29:17

coeperunt autem prima die mensis primi mundare et in die octava eiusdem mensis ingressi sunt porticum templi Domini expiaveruntque templum diebus octo et in die sextadecima mensis eiusdem quod coeperant impleverunt

2 Chronicles 29:18

ingressi quoque sunt ad Ezechiam regem et dixerunt ei sanctificavimus omnem domum Domini et altare holocaustoseos vasaque eius necnon et mensam propositionis cum omnibus vasis suis

2 Chronicles 29:19

cunctamque templi supellectilem quam polluerat rex Achaz in regno suo postquam praevaricatus est et ecce exposita sunt omnia coram altari Domini

2 Chronicles 29:20

consurgensque diluculo Ezechias rex adunavit omnes principes civitatis et ascendit domum Domini

2 Chronicles 29:21

obtuleruntque simul tauros septem arietes septem agnos septem et hircos septem pro peccato pro regno pro sanctuario pro Iuda dixit quoque sacerdotibus filiis Aaron ut offerrent super altare Domini

2 Chronicles 29:22

mactaverunt igitur tauros et susceperunt sacerdotes sanguinem et fuderunt illud super altare mactaverunt etiam arietes et illorum sanguinem super altare fuderunt immolaverunt agnos et fuderunt super altare sanguinem

2 Chronicles 29:23

adplicaverunt hircos pro peccato coram rege et universa multitudine inposueruntque manus suas super eos

2 Chronicles 29:24

et immolaverunt illos sacerdotes et asperserunt sanguinem eorum altari pro piaculo universi Israhelis pro omni quippe Israhel praeceperat rex ut holocaustum fieret et pro peccato

2 Chronicles 29:25

constituit quoque Levitas in domo Domini cum cymbalis et psalteriis et citharis secundum dispositionem David et Gad videntis regis et Nathan prophetae siquidem Domini praeceptum fuit per manum prophetarum eius

2 Chronicles 29:26

steteruntque Levitae tenentes organa David et sacerdotes tubas

2 Chronicles 29:27

et iussit Ezechias ut offerrent holocaustum super altare cumque offerrentur holocausta coeperunt laudes canere Domino et clangere tubis atque in diversis organis quae David rex Israhel reppererat concrepare

2 Chronicles 29:28

omni autem turba adorante cantores et hii qui tenebant tubas erant in officio suo donec conpleretur holocaustum

2 Chronicles 29:29

cumque finita esset oblatio incurvatus est rex et omnes qui erant cum eo et adoraverunt

2 Chronicles 29:30

praecepitque Ezechias et principes Levitis ut laudarent Dominum sermonibus David et Asaph videntis qui laudaverunt eum magna laetitia et curvato genu adoraverunt

2 Chronicles 29:31

Ezechias autem etiam haec addidit implestis manus vestras Domino accedite et offerte victimas et laudes in domo Domini obtulit ergo universa multitudo hostias et laudes et holocausta mente devota

2 Chronicles 29:32

porro numerus holocaustorum quae obtulit multitudo hic fuit tauros septuaginta arietes centum agnos ducentos

2 Chronicles 29:33

sanctificaveruntque Domino boves sescentos et oves tria milia

2 Chronicles 29:34

sacerdotes vero pauci erant nec poterant sufficere ut pelles holocaustorum detraherent unde et Levitae fratres eorum adiuverunt eos donec impleretur opus et sanctificarentur antistites Levitae quippe faciliori ritu sanctificantur quam sacerdotes

2 Chronicles 29:35

fuerunt igitur holocausta plurima adipes pacificorum et libamina holocaustorum et conpletus est cultus domus Domini

2 Chronicles 29:36

laetatusque est Ezechias et omnis populus eo quod ministerium Domini esset expletum de repente quippe hoc fieri placuerat