2 Chronicles 12

16 versículos

2 Chronicles 12:1

cumque roboratum fuisset regnum Roboam et confortatum dereliquit legem Domini et omnis Israhel cum eo

2 Chronicles 12:2

anno autem quinto regni Roboam ascendit Sesac rex Aegypti in Hierusalem quia peccaverunt Domino

2 Chronicles 12:3

cum mille ducentis curribus et sexaginta milibus equitum nec erat numerus vulgi quod venerat cum eo ex Aegypto Lybies scilicet et Trogoditae et Aethiopes

2 Chronicles 12:4

cepitque civitates munitissimas in Iuda et venit usque Hierusalem

2 Chronicles 12:5

Semeias autem propheta ingressus est ad Roboam et principes Iuda qui congregati fuerant in Hierusalem fugientes Sesac dixitque ad eos haec dicit Dominus vos reliquistis me et ego reliqui vos in manu Sesac

2 Chronicles 12:6

consternatique principes Israhel et rex dixerunt iustus est Dominus

2 Chronicles 12:7

cumque vidisset Dominus quod humiliati essent factus est sermo Domini ad Semeiam dicens quia humiliati sunt non disperdam eos daboque eis pauxillum auxilii et non stillabit furor meus super Hierusalem per manum Sesac

2 Chronicles 12:8

verumtamen servient ei ut sciant distantiam servitutis meae et servitutis regni terrarum

2 Chronicles 12:9

recessit itaque Sesac rex Aegypti ab Hierusalem sublatis thesauris domus Domini et domus regis omniaque secum tulit et clypeos aureos quos fecerat Salomon

2 Chronicles 12:10

pro quibus fecit rex aeneos et tradidit illos principibus scutariorum qui custodiebant vestibulum palatii

2 Chronicles 12:11

cumque introiret rex domum Domini veniebant scutarii et tollebant eos iterumque referebant ad armamentarium suum

2 Chronicles 12:12

verumtamen quia humiliati sunt aversa est ab eis ira Domini nec deleti sunt penitus siquidem et in Iuda inventa sunt opera bona

2 Chronicles 12:13

confortatus est igitur rex Roboam in Hierusalem atque regnavit quadraginta autem et unius anni erat cum regnare coepisset et decem septemque annis regnavit in Hierusalem urbe quam elegit Dominus ut confirmaret nomen suum ibi de cunctis tribubus Israhel nomenque matris eius Naama Ammanitis

2 Chronicles 12:14

fecit autem malum et non praeparavit cor suum ut quaereret Dominum

2 Chronicles 12:15

opera vero Roboam prima et novissima scripta sunt in libris Semeiae prophetae et Addo videntis et diligenter exposita pugnaveruntque adversum se Roboam et Hieroboam cunctis diebus

2 Chronicles 12:16

et dormivit Roboam cum patribus suis sepultusque est in civitate David et regnavit Abia filius eius pro eo

2 Chronicles 13